Shën Ignati i Antiokisë
Peshkop i Antiokisë së Sirisë dhe nxënës i apostujve, Shën Ignati u dënua t’u hidhej egërsirave në Romë nën perandorin Trajan, rreth vitit 107. Gjatë rrugës për në martirizim, i lidhur me pranga dhe i ruajtur nga ushtarët, ai shkroi shtatë letra: gjashtë Kishave të Azisë së Vogël dhe një Shën Polikarpit të Smirnës. Ato janë ndër dëshmitë më të çmuara të Kishës së hershme: për bashkimin rreth peshkopit, presviterëve dhe dhjakonëve, për mishërimin dhe mundimin e vërtetë të Krishtit, dhe për Eukaristinë si mishi i Krishtit.